Na Mwandishi Wetu WAMACHINGA
Dar es Salaam, mji mkubwa na wa kihistoria nchini Tanzania, ni injini muhimu ya uchumi wa taifa. Ikiwa lango kuu la biashara kwa ukanda wa Afrika Mashariki, jiji hili lina mchango mkubwa katika kukuza uchumi wa kitaifa kupitia bandari yake yenye shughuli nyingi, biashara za kimataifa, na uwekezaji wa ndani na nje ya nchi.
Zaidi ya hayo, Dar es Salaam ni makazi ya idadi kubwa ya wajasiriamali na wafanyabiashara wadogo ambao huendesha shughuli zao kila siku, wakichangia katika kuboresha maisha ya wakazi na kuinua pato la taifa.
Mbali na kuwa kitovu cha biashara, jiji hili linaendelea kuwa mfano wa ukuaji wa kiuchumi kupitia uwekezaji wa kimkakati katika miundombinu, usafirishaji, na huduma za kijamii.
Kuanzia maendeleo ya barabara, mifumo ya usafiri wa umma, hadi miradi ya maji safi na usafi wa mazingira, Dar es Salaam inaendelea kuwa na nafasi ya pekee katika kuimarisha ustawi wa jamii na kutoa nafasi za ajira kwa maelfu ya wananchi.
Kwa kutambua hilo Mkuu wa Mkoa wa Dar Es Salaam Albert Chalamila amesema kuwa Mkoa wa Dar es Salaam unatarajia kuanzisha mfumo wa biashara kwa saa 24 kwa mara ya kwanza katika soko la kimataifa la Kariakoo.
RC Chalamila amesema hatua inayolenga kubadilisha sura ya jiji hilo na kuimarisha uchumi wa Tanzania kwani eneo la Kariakoo limekuwa ni eneo linaloleta fedha nyingi kupitia kodi Serikalini
RC Chalamila, ametangaza mpango huu wakati wa kutoa taarifa ya mwisho wa mwaka na salamu za Krismasi na mwaka mpya kwa wakazi wa Mkoa huo wakati alipokuwa akizungumza na waandishi wa Habari Leo jijini humo.
Amesema kuwa huduma hiyo itaanza Januari 2025 katika eneo la Kariakoo kabla ya kusambazwa katika maeneo mengine.
” mpango huo unalenga kuongeza fursa za ajira, kuimarisha uwekezaji, na kuboresha ustawi wa wakazi wa jiji hilo na taifa kwa ujumla,tunahitaji jiji linalofanya kazi masaa 24, na mfumo huu utafungua milango zaidi kwa biashara na huduma kwa wananchi,” alisema.
