Na Mwandishi Wetu WAMACHINGA
Dar es Salaam
Katika harakati za kuboresha sekta ya kilimo na kuongeza ushindani wa Tanzania katika masoko ya kimataifa, taasisi ya Vanguard Global Development imeandaa mkutano muhimu wa wadau utakaoangazia uwasilishaji wa Mpango wa Kitaifa wa Miundombinu ya Cold Chain.
Mkutano huu utafanyika siku ya Jumatatu, tarehe 2 Juni 2025, katika Serena Hotel, jijini Dar es Salaam, kuanzia saa 4:00 asubuhi hadi saa 1:00 jioni. Tukio hili linalotarajiwa kuvuta usikivu wa kitaifa, litawahusisha viongozi wa juu wa serikali, wakiwemo mawaziri kutoka wizara za Kilimo, Biashara, Mifugo na Uvuvi pamoja na Uchukuzi. Wadau wengine watakaoshiriki ni kutoka sekta binafsi, mashirika yasiyo ya kiserikali, watoa huduma za usafirishaji, wauzaji wa bidhaa nje ya nchi, pamoja na mashirika ya maendeleo.
Mpango huu wa miundombinu ya cold chain unalenga kubadilisha kabisa namna ambavyo bidhaa zinazoharibika kwa haraka — kama matunda, mboga mboga, samaki na nyama — zinahifadhiwa na kusafirishwa, kuanzia mashambani hadi masoko ya ndani na nje ya nchi.
Kwa mujibu wa Vanguard Global Development, mpango huu utawezesha, Kupunguza kwa kiwango kikubwa upotevu wa mazao baada ya kuvuna.
Kutoa msaada wa moja kwa moja kwa wakulima wadogo, wavuvi na wazalishaji wa nyama zaidi ya 100,000 nchini.
Kuimarisha uwezo wa nchi katika kutoa vyeti vya ubora na usalama wa bidhaa, jambo muhimu kwa mauzo ya kimataifa.
Kujenga mtandao wa kisasa wa usafirishaji wa bidhaa zinazoharibika kwa kutumia teknolojia ya uhifadhi baridi, kupitia ushirikiano kati ya sekta ya umma na binafsi (PPP).
Akizungumza kuhusu tukio hilo, Bw. Mujwahuzi Alexander kutoka Vanguard Global Development alisema,
“Tunatamani kuiona Tanzania ikiimarisha mnyororo wa thamani wa mazao ya kilimo kwa kujenga miundombinu ya uhifadhi na usafirishaji wa baridi ambayo ni ya kuaminika na inayoendeshwa na teknolojia.”
Mkutano huu ni wa mwaliko maalum, na wadau wanaotamani kushiriki wanahimizwa kuwasiliana kupitia:
Barua pepe: contact@vanguardglobal-development.com
Mpango huu unatarajiwa kuwa kichocheo cha mageuzi makubwa katika sekta ya kilimo, biashara ya bidhaa zinazoharibika, na ajira. Pia, utachangia kukuza uchumi wa vijijini na kuongeza mapato yatokanayo na mauzo ya nje ya bidhaa bora
